Вельмі цікавы абрад “Звязда” бытуе ў вёсках Гадзічава і Маркавічы. Ён праводзіцца з 7 па 12 студзеня і з’яўляецца часткай традыцыі калядавання, якая складаецца з калядавання са звяздой, шчадраванне, засяванне. Сам абрад схожы з калядаваннем, але з’яўляецца больш святочным. Сваімі каранямі ён сыходзіць у сядыя вякі, а з цягам часу асіміляваўся хрысціянствам і набыў больш духоўны характар.
У гэтым годзе да калядавання ў Маркавічах і Гадзічава далучыліся сябры Гомельскай моладзевай краязнаўчай грамадскай арганізацыі “Талака” і дырэктар Веткаўскага музея стараабрадніцтва і беларускіх традыцый імя Ф. Р. Шклярава Пятро Цалка. Вялікая роля ў захаванні і папулярызацыі гэтага абраду належыць Рыгору Басаву.
Цяпер захавальнікамі традыцыі з’яўляецца сям’я Віктара Шыпкова. За час правядзення абраду з 2005 года ўжо склаўся сямейны гурт. Удзельнікі абрада падчас абыходу спяваюць кандак і трапар Ражаства, духоўныя вершы-псальмы і абавязкова мясцова адметны распеў “Многая лета”. Падыходзячы да хаты, адзін з калядоўшчыкаў, звычайна той, што носіць звязду, заходзіць у двор, стукае ў вакно і пытае: “Ці пусціце звязду?”. Калі гаспадары даюць дазвол, то ўсе заходзяць у хату, становяцца насупраць чырвонага кута і пачынаюць спяваць.
Цікава, што “Звязда” абавязкова заходзіць у хату першай, а выходзіць апошняй. Мясцовыя жыхары лічаць, што яна прыносіць у хату шчасце і дабрабыт.
436
