Сёння на базе цэнтра экалагічнага адпачынку і рыбалкі “Беладжыа” адбылося тэатралізаванае прадстаўленне “Масленіца”, якое падрыхтавалі работнікі цэнтра культуры Гомельскага раёна. Першымі з зімой развіталіся і сустрэлі вясну навучэнцы і педагогі Урыцкай сярэдняй школы.
Апошні тыдзень перад пачаткам Вялікага паста праходзіць шырокая Масленіца, калі людзі пакрысе адмаўляюцца ад мясных прадуктаў і аддаюць перавагу малочным стравам. А вось у народнай традыцыі Масленіца больш вядома як перыяд развітання з зімою і гукання вясны. Таму і атрыбуты свята — чучала, якое спальвалі, і бліны — тоўсценькія для мачанкі альбо танюсенькія карункавыя, якія найбольш смачныя з салодкімі начынкамі.
Аб усім гэтым расказалі Зіма, Баба Яга, скамарохі, Ямеля і, канечне, Вясна з Масленіцай — галоўныя героі тэатралізаванага прадстаўлення:
— Дарэчы, кожны дзень масленічнага тыдня мае сваю назву. Напрыклад, серада — ласун (па-руску — лакомка), чацвер —разгуляй, бо пачыналіся самыя вясёлыя забавы і гульні. А нядзеля атрымала назву Дараванай, бо ў гэты дзень людзі прасілі дараваць крыўды і не трымаць на іх зла.
Бліны — самы што ні на ёсць народны фастфуд: іх можна хутка прыгатаваць, духмяныя жоўценькія кругляшы зручна есці нават на вуліцы. Таму гэтая старва — абавязковы атрыбут народных гулянняў.
На народнае гулянне ў суботу і нядзелю запрашаюць жыхароў і гасцей дваццаці населеных пунктаў: аграгарадкоў Бабовічы, Пакалюбічы, Аздзеліна, Яроміна, Урыцкае, Краснае, Цярэшкавічы, Міхалькі, пасёлкаў Бальшавік і Зябраўка, вёсак Бярозкі, Пясочная Буда, Рудня Марымонава, Зябраўка, Маркавічы, Лапаціна, Даўгалессе і Рагі. А раённае мерапрыемства адбудзецца ў Новай Гуце 14 сакавіка. Тут будзе ўсё: гульні, песні з танцамі, і, канешне, бліны…
Ірына ГРАМЫКА. Фота Марыны ВАСІЛЬЕВАЙ.